Pekanbaru, Kabarmonitor.co.id dicaritoan yo sabana sadiah, labih sadiah pado Film Hindia. Satiok hujan tibo, banjir sato juo malendo. Marandam sado nan ado. Alun hilang jajak luko Agustus ka patang, Oktober banjir baliak manjalang. Yo, sabana malang
Nan luko samakin dalam, katiko urang rami tibo mambarasihan sagalo nan marandam, ehhhh wakia rakyaik nan 7 Dapil Kuranji, indak mancogok batang hiduangnyo. Antah kamalah nyo, mahilang katiko bancano tibo.
Bagumam juo urang dek parangai nan indak paduli bancano. Jan arok suaro sajo, caliak juo katiko malang manimpo. Samantaro, Brimob Polda Sumbar, manurunksn labiah 100 anggota, Sat Pol PP, sato pulo, Dinas PUPR jan ditanyo
Baitu juo Dinas Pendidikan lai mancogok, Dinas Lingkungan Hidup, tibo bakalompok, indak lupa BPBD mancigok nan wakia rakyaik mungkin takalok. Tujuh hari tujuh malam, manunggu, nan diharok datang, antah kama mahilang, ondeh malang
Lain pulo carito kapalo sakolah. Kalau ndak salah (barati batua) namonyo Amridas. Langkah cerdas dibuek, malibatkan guru jo murid mambarasihan sakolah nan tabanam aia jo lumuik. Tapi, pakai syaraik, kok ado guru rumahnyo tarandam, buliah indak datang.
Murik, rumahnyo kanai juo, buliah Indak tibo. Nan paralu bana tibo, mawakili kelas 5 urang ditambah jo pengurus OSIS 20 urang. Sato pulo guru jo pagawai. Ibo juo Wak, katiko mambarasihan lumuik, aia mati. Tapi pantang baputuih aso, mambao embe, maambiak aia di batang aia
Jo samangaik gotong royong, sakolah barasiah juo. Walau, urang nan diharok an, antah dima rimbonyo. Jadi palajaran ito basamo, katiko bancano tibo. Jan arok jo urang nan mawakili awak. Rancak dikarajoan sajo, disalasaikan basamo. Carito sampai disiko. Tunggu sajo kalanjuik an nyo.
Redaksi Hardedi